АСЛАНЫМ ЙӦЛЫС ТЫРМЫМӦН

Татшӧм кывкӧртӧд вӧчис районас неважӧн волігӧн республикаса правительствоӧн веськӧдлысьӧс вежысь, видз-му овмӧс да потребительскӧй рынок кузя министр Анатолий Князев.

Талун Изьва районын, пасйис чина морт, лысьтӧны аслыныс коланасьыс 70 прӧчент. Тайӧ абу этша. Войвылад скӧттӧ вӧдитны абу кокни, да тырмымӧнысь унджык зільны лысьтынысӧ оз и ков.

Тані мукӧдлаын серти ас овмӧсъясас медся уна видзӧны мӧссӧ — 900 юрысь вывті. И тӧдчана, мый эм кытчӧ инавны, кодлы вузавны йӧвсӧ.

Анатолий Князевлӧн кывъяс серти, Изьва районын, кӧні сикт-грездыс разалӧма, шуӧма кы-пӧдны неыджыд, 200-ысь абу унджык юр вылӧ, фермаяс.

Буретш татшӧмӧс стрӧитӧма республикаӧс сӧвмӧдан уджтас серти Діюрын да Сизябын. Воддзаас семьяӧн вӧдитан картасӧ артыштӧма 100 мӧскӧс видзны. Ставсӧ сэні механизируйтӧма-автоматизируйтӧма. Кольӧм во сійӧс кыпӧдны вичмӧма 13 миллион 560 сюрс шайта грант, сы лыдын 7 миллион 398 сюрсыс — республикалӧн кудйысь, 6 миллион 162 сюрсыс — федеральнӧй бюджетысь.

Выль фермаас ӧні холмогор пӧрӧдаа 22 мӧс. Овмӧснас веськӧдлысь Ольга Терентьевалӧн висьталӧм серти, матысса кадӧ нин лӧсьӧдчӧны ньӧбны нӧшта 10 ялавичӧс.

Сизябын 208 мӧс юр вылӧ артыштӧм выль фермасӧ кыпӧдӧм могысь видзӧмаӧсь 46,3 миллион шайт, кызвын сьӧмсӧ вичмӧдӧма республика. Бара жӧ став оборудованиеыс сэні ӧнія.

Сэк жӧ, кыдз тӧдчӧдіс Анатолий Князев, регионса правительствоӧс майшӧдлӧ, мый яй вылӧ быдтан-тшӧгӧдан скӧтыс республикаын этша на. Видз-му овмӧс министерство вичмӧдӧ та могысь ӧшпи-кукань ньӧбысьяслы субсидия.

Изьва районысь тайӧ нырвизяс босьтчысь фермер Владимир Каневлы таво вичмӧдӧмаӧсь 1,5 миллион шайта грант. И ноябрын нин воссяс яй вӧчан ӧнія технологияяс сӧвмӧдан ферма, кодӧс артыштӧма 40 юр вылӧ.

Юӧртӧ "Коми му" газет

Регион: