Быдтам кык кывъя кагаӧс

Вит во нин карын ми верӧскӧд быдтам пиӧс. И вит во сёрнитам сыкӧд комиӧн. Ӧні Ёгор бура сёрнитӧ и рочӧн, и комиӧн. Мый жӧ ми вӧчам? Ми быдтам кык кывъя кагаӧс. Туялысьяс шуӧны, мый кык кывйӧ дзоля мортӧс позьӧ велӧдны некымын ногӧн. И быд бать-мам асьныс бӧрйӧны, кыдзи налы кивывджык. Позьӧ босьтны нырвизь пыдди «ӧти рӧдитель — ӧти кыв». Шуам, батьыс роч, мамыс коми. Семьяын, ас котыр пытшкын, кагакӧд батьыс сёрнитӧ рочӧн, мамыс — комиӧн. Ичӧтик морт ӧдйӧ велалӧ кык кыв дорӧ да оз сорав, кодкӧд кыдзи сёрнитны. Тадзи позьӧ велӧдны и коми семьяын, окота кӧ, мед каганыс водзджык и роч кывсӧ тӧдмаліс. Сӧмын бать-мамлы ковмас зэв сюся видзӧдны, мед эз сорасьны да пыр сёрнитны «аслас» кывйӧн. Эм мӧд туй: «ӧти места — ӧти кыв». Гортын сёрнитам комиӧн, а ывлаын, лавкаын, поликлиникаын — рочӧн. Тадзи кага тшӧтш зэв ӧдйӧ велалӧ кык кывйӧ. Менам чайтӧм серти, тайӧ ёнджыка кажитчас налы, кодъяс яндысьӧны карса уличын варовитны комиӧн. Ми семьяын мунім коймӧд нырвизьӧд. Кагакӧд ми сёрнитам сӧмын комиӧн. Кӧть кӧні, кӧть кор — детсадйын, автобусын, поликлиникаын, лавкаын — пыр комиӧн. Рочасьыштны вермам сӧмын сэк, кор миянкӧд сёрнитӧ роч морт. Роч кывйӧ Егор велаліс садикын. Дерт, медводдза восӧ сьӧкыдджык вӧлі сылы, а ӧні зэв бура артмӧ. Ӧтырышъя нин вермӧ кык кыв вылын сёрнитны. Сідз, садикын миянлы висьтасяс комиӧн да сэк жӧ рочӧн вермас шуны мыйкӧ ёртыслы. Сідзкӧ, каганым бура нин тӧдӧ, кор да кодкӧд кутшӧм кывйӧн колӧ сёрнитны. Збыльысь кӧ, тайӧ зэв кокни — карын сёрнитны кагакӧд комиӧн. Но бать-мам мыйлакӧ полӧны таысь. Эн полӧй, сёрнитӧй челядьыдкӧд комиӧн, и ті тӧдлытӧг быдтанныд кык кывъя кагаӧс! Кор миян чужис ныв, Егор юаліс: «А кутшӧм кывйӧн кутас сёрнитны Рита?» И ачыс вочавидзис: «Кутам кӧ сыкӧд комиасьны, Рита тшӧтш кутас сёрнитны комиӧн...» "Коми му" газет

Регион: 
Автор материала: