И пенсия вылӧ – ӧтуввез пыр

Россия Федерацияса Пенсия фондлӧн электроннӧй сервисъяс йылысь корим паськыдджыка висьтавны Коми Республикаын тайӧ ведомствоыслӧн отделениеӧн веськӧдлысьӧс вежысь Елена Шаталоваӧс. –Елена Юрьевна, дыр-ӧ нин уджалӧ «Личный кабинет гражданина» сервисыс да кодлы кивыв сыӧн вӧдитчынысӧ? –Татшӧм кабинетсӧ вӧлі восьтӧма 2015 воын. Ӧтарӧ содӧ сылӧн сідз шусяна сервисыс да, пыр кивывджык лоӧ сыӧн вӧдитчынысӧ кыдз уджалысь йӧзлы, сідз и пенсионеръяслы, тшӧтш и «мам капитал» босьтысьяслы. Кабинетсӧ юкӧма услугаяс тӧд вылын кутӧмӧн, шуам, торйӧн позьӧ шыӧдчывны пенсия да мукӧд социальнӧй пособие, «мам капитал» босьтӧм кузя, а сідзжӧ пыравны сэтчӧ регистрируйтчӧмӧн либӧ татӧг. –Кутшӧм электроннӧй услугаяс артыштӧма пенсионерлы? –Сійӧ вермас ӧтуввезйын «аслас кабинет» пырыс вежны пенсия босьтанногсӧ. Шуам, олӧма мортлы пенсиясӧ вайӧны гортас. А сылы окота лои босьтны тайӧ сьӧмсӧ банкса картаӧн. Либӧ мӧдарӧ, мед гортас вайисны, банкӧ сьӧкыд нин ветлынысӧ да. И та могысь сійӧ вермас шыӧдчывны Пенсия фондлӧн юкӧнӧ «личнӧй кабинет» пыр. Тадзи жӧ ӧтуввез отсӧгӧн позьӧ мӧдӧдны пӧрысьлун серти пенсия артыштӧм-урчитӧм могысь шыӧдчӧм. Пенсия фондас став колана документыс кӧ эм, олӧма мортлы аслыс оз нин ков сэтчӧ волынысӧ. А мыйкӧ кӧ оз тырмы, ӧтуввез пыр жӧ корасны содтӧд мӧдӧдны. –А кыдзи тӧдмавны, эм-ӧ Пенсия фондас мортыслӧн удж кузя став колана юӧрыс? –Тайӧс сідзжӧ позьӧ видзӧдлыны сылы «аслас кабинет» пыр «Информирование о пенсионных правах» сервис отсӧгӧн. –Елена Юрьевна, кутшӧм позянлунъяс сетӧма «мам капиталӧн» вӧдитчысьлы? –Татшӧмыслы «личнӧй кабинет» пырыс жӧ позьӧ шыӧдчывны «мам капитал» кузя сертификат, а сідзжӧ тайӧ сьӧм весьтас 25 сюрс шайт босьтӧм могысь. –А кыдзи мӧдӧдны Пенсия фондӧ «мам капитал» босьтӧм могысь мукӧд колана документсӧ? –Найӧс ковмас вайны нывбаба-мамлы аслыс. Сӧмын 25 сюрс шайтсӧ босьтӧм могысь оз ков волынысӧ, та йылысь шыӧдчӧмсӧ кӧ мортыс ыстӧма «аслас кабинет» пыр. –Нӧшта кодлы эм водзӧсыс татшӧм электроннӧй сервисъяссьыс? –Став уджалысьыслы. «Личнӧй кабинет» пыр налы позьӧ тӧдмавны, ыджыд-ӧ нин страхуйтӧм стажныс, уна-ӧ чукӧрмӧма пенсия баллныс, мынтӧ оз уджӧн могмӧдысьныс Пенсия фондӧ сылӧн тшӧт вылӧ сьӧмсӧ да уна-ӧ вуджӧдӧма нин. Колӧ тӧдчӧдны, мый медвойдӧр балл лыдсӧ тӧд вылӧ босьтӧмӧн шуӧма артавны пенсиясӧ. Кымын унджык чукӧрмас, сымын ыджыдджык лоас мортыслӧн пенсияыс. –Мый колӧ вӧчны, кӧні регистрируйтчыны, медым вӧдитчыны «личнӧй кабинетнас»? –Мортыс кӧ регистрируйтчӧма нин госуслугаяс порталын, сылы оз нин ков сэсся нинӧм вӧчны. «Личнӧй кабинетӧ» сійӧ и сідз вермас пыравны. –А миян республикаын олысьяс тшӧкыда пыравлӧны татшӧм кабинетас? –Таво сентябрын пенсия босьтӧм могысь шыӧдчысьясысь джынйыс вӧчисны тайӧс «личнӧй кабинет» пыр. Восӧ кӧ ставнас босьтны, то миян ведомствоӧ коймӧд юкӧн шыӧдчӧмыс воӧ ӧтуввез пыр. "Коми му" газет юӧр серти.
Регион: