Кӧть вӧлӧма кытчӧ инавны шыблассӧ

100 сюрс шайт штрап шуӧма перйыны Кулӧмдін районысь «Оптима-Лес» ООО-лысь республикаса мупытшкӧсса озырлунӧн вӧдитчан да вӧр-ва видзан министерство. Вӧлӧмкӧ, тайӧ предприятиеыс вит во чӧж нин пилитчӧм бӧрас став коляссӧ новлӧ Помӧсдін сиктсянь неылӧ Мылдін районлань мунысь туй бокӧ, кӧні кык кымын гектар вылын пилипызьыс да ковтӧм гӧрбыльыс чукӧрмӧма нин вит сюрс гӧгӧр кубометр. Кадысь кадӧ ӧзтылӧны вӧлӧм, медым сотӧмӧн чинтыштны лӧп-шыблассӧ. Сиктсаяс сэсся шыӧдчӧмаӧсь вӧр-ва видзан министерствоысь специалистъяс дорӧ, кодъяс волӧмаӧсь Помӧсдінӧ матігӧгӧр вӧрвасӧ видзӧдлӧм могысь. Казьтыштам, татшӧм рейдъяссӧ ведомствоас нуӧдӧны республикаса Юралысьлысь удж вӧчысь Сергей Гапликовлӧн индӧд серти, мед вӧр лэдзысьяс да переработайтысьяс парма-ягыслы лёксӧ эзджык вӧчны. А, кыдз тыдовтчӧ, вӧчӧны на. 2014 во помын Эжва йылын Кулӧмдін сиктын эштӧдӧмаӧсь вӧр коляс чукӧртан торъя площадка. Но сы пыдди, медым ваявны сэтчӧ ассьыныс шыблас-коляссӧ, «Оптима-Лес» ООО-саяс новлӧмаӧсь ковтӧмторсӧ Помӧсдінсянь куим километр сайӧ. Предприятиеӧн веськӧдлысьяс абу пыксьӧмаӧсь асланыс мыжысь. Помӧсдін сиктса администрациякӧд ӧтвылысь ӧні дасьтӧны вӧр переработайтӧм бӧрын шыблас-коляссӧ чукӧртан торъя площадка, кысянь сэсся мӧдасны новлыны Кулӧмдінӧ та могысь урчитӧминас.

"Коми му" газет юӧр серти

Регион: