Лоны мортӧн...

Сійӧ быдмис  Позялӧмын, но Лӧзым лоис сылы ас сиктӧн жӧ.

Гӧсьтъясӧс медводз вочааліс «Передо мною жизни даль» фотовыставка. Культура керкаын зільысьяс дасьтӧмаӧсь Александр Некрасовлӧн небӧгъясысь, газет-журналын йӧзӧдлӧм сылӧн гижӧдъясысь выставка. Лӧзымса культура керкаӧн веськӧдлысь Елизавета Сивергина вӧзйис видзӧдны Александр Некрасов йылысь «Быть Человеком» фильм, кодӧс снимайтӧмаӧсь клубын  уджалысьяс жӧ.

Александр Некрасовлӧн рӧдвуж да гӧсьтъяс водзын петкӧдчис культура керкаысь худрук Дмитрий Мартынов, сьыліс «Коми зон», код дорӧ шыладсӧ тэчӧма композитор Иван Нестеров. Казьтыштам, «Коми зон» сьыланкывсӧ республикаса «Василей-2012» фестиваль вылын вӧлі донъялӧма видзӧдысьяслӧн призӧн, а Дмитрий Мартыновлӧн жӧ да Иван Нестеровлӧн «Лида-Лидочка» сьыланкыв  «Василей-2014»  гаж дырйи босьтіс мӧд места, сідзжӧ – видзӧдысьяслысь приз.

Дмитрий Мартынов жӧ сьыліс комиӧн Сергей Есенинлысь «Не жалею, не зову, не плачу» («Ме ог жалит, ме ог кор, ог бӧрддзы»). Коми кыв вылӧ вуджӧдліс буретш Александр Некрасов. Мужичӧйяслӧн «Раздолье» вокальнӧй ансамбль сьыліс «После разлуки», а культура керкаӧн веськӧдлысь Елизавета Сивергина, сиктса ветеранъяслӧн сӧветӧн веськӧдлысь Роза Симакова да овмӧдчанінлӧн администрацияысь специалист Елена Смородинова – «Лӧзым». Тайӧ сьыланкывйыс, код дорӧ шыладсӧ гижліс композитор Михаил Оверин, важӧн нин лои сиктныслӧн гимнӧн.

Галина Нечаева лыддис «Лӧзымса чай» кывбур, кӧні Александр Некрасов казьтыштӧма сиктын став пыдди пуктана йӧзсӧ.

Сылӧн Светлана Андреевна гӧтырыс тӧдмӧдіс чукӧртчӧмаясӧс верӧсыслӧн рӧдвужкӧд.

Гӧсьтъяс водзын сёрнитісны Александр Некрасовлӧн чойыс Валентина Некрасова да Лида племяничаыс. Найӧ аттьӧалісны культура керкаын уджалысьясӧс тайӧ казьтылана рытсӧ котыртӧмысь да Александр Некрасовлы сиӧм фильм дасьтӧмысь.

Рыт вылас вӧлі и Сыктывдін районса администрацияӧн веськӧдлысь Олег Лажанев. Сійӧ пасйис, мый Александр Некрасов вӧлі бур коми мортӧн, вужвойтырӧс дорйысьӧн. Пуктіс ыджыд пай коми литература сӧвмӧдӧмӧ.

А районса сӧветӧн веськӧдлысь Светлана Савинова серти, депутаталігас Александр Некрасовлӧн пыр вӧлӧма быд юалӧм вылӧ аслас видзӧдлас.

Бур кывйӧн казьтыштіс Александр Некрасовӧс и Лӧзым сиктӧн выль веськӧдлысь Владимир Костин. Сійӧ лыддис поэтлысь «Себе я царь и господин» небӧгысь кывбур.

Помасис рытыс пызан сайын. Пӧсь тшай юигмоз гӧсьтъяс дыр на казьтывлісны Александр Васильевичӧс.   

* * *

Казьтыштам, таво августын Сыктывдін районса сӧветысь депутатъяс ошкисны «Коми войтыр» ӧтмунӧмлӧн районса юкӧнлысь вӧзйӧм да кувсьӧм бӧрас нин сетісны Александр Васильевич Некрасовлы «Сыктывдін районса почёта гражданин» ним.  

"Коми му" газет. Владимир МУРАВЬЁВ.

Снимокыс авторлӧн.


Регион: 
Автор материала: