РАДЕЙТӦМӦН ДА ЭСКӦМӦН

Сыктывкарын, кыдзи и Россия пасьталаын, кыпыда пасйисны семьялы да радейтчӧмлы сиӧм гаж. Сыктывкарса шӧр бассейн дорын мича сцена вылын нимӧдісны 35 воысь дырджык ӧтлаын олысь да ӧта-мӧдыслы эскысь гозъяӧс. «За любовь и верность» медаль сетісны Военушкинъяслы, Подоровъяслы, Поповъяслы, Емельяновъяслы, Протасовъяслы, Новосёловъяслы да Тарабукинъяслы. Сэні жӧ кыпыда нимӧдісны тайӧ лунӧ кӧлысь ворсысь Анастасия да Константин Куликовъясӧс. Том гозъя ӧтлаын олӧны кӧкъямыс во нин. Быдтӧны Ярослав пиӧс. И со шуӧмаӧсь гижсьыны. Шуда гозъя радейтӧны, пыдди пуктӧны ӧта-мӧднысӧ да эскӧны, мый нэмсӧ оз торъявны. Семьялысь сиӧм гажсӧ котыртысьяс козьналісны Константинлы да Анастасиялы акань-видзӧгъяс. Важся йӧзлӧн висьталӧм серти, найӧ видзӧны гозъялысь ӧта-мӧд дораныс муслунсӧ да семьялысь ӧтувъялунсӧ. Республикаса удж, занятосьт да йӧзӧс дорйӧм кузя министрӧс вежысь Светлана Суворкина козьналіс том гозъялы Вежа Петырлысь да Феврониялысь ӧбраз. А гаж котыртысь спонсорсянь Куликовъяслы вичмис Сыктывкарса ресторанын ужнайтӧм вылӧ сертификат. Россияын важысянь кӧлысь лунӧ гозъя лэдзӧны енэжӧ еджыд гулюясӧс да видзӧдӧны, кодлӧн лэбачыс кыпӧдчас вылӧджык. Верӧсыслӧн кӧ – медводдза кагаыс лоас зонка, гӧтырыслӧн кӧ – чужас нывка. Юркарын семьялы сиӧм гажыс помасис гажа концертӧн.

"Коми му" газет. Снимокъясыс ӧтуввезйысь.

Регион: 
Автор материала: