Усинскын мунiс районса йöзкост творчестволöн «Йöлöга» фестиваль. Мероприятиесö котыртiсны дасöдысь нин. Таво фестивальсö восьтiс Пера-багатыр йылысь спектакль, сiйöс петкöдлiсны Усвавом сиктысь том ворсысьяс. Сiдзжö гажöдчöм вылö волiсны Мутнöй Материк, Денисов, Закарвань, Щельябöж, Лыжавом, Акись, Колва да Усинскысь артистъяс.

Участникъяслы да гöстьяслы уджалiс ярмарка да выставка, петкöдлiсны коми кыйсян-вöралан кöлуй, национальнöй паськöм, серпасъяс да вурöмторъяс. Мероприятиесö восьтiгöн öзтiсны фестивальлысь символ — куим сись. Медводдзасö öзтiсны фестивальлöн водзмöстчысьяс — Усвавомысь Татьяна Викторова да Нöвикбöжысь Валентина Филиппова. Мöдсö - колян вося фестивальын видзöдысьяслысь приз босьтысь Мутнöй Материк сиктысь коллектив. Коймöдсö Нöвикбöжысь медся олöма морт Мария Рочева да медся том — вит арöса Галина Косюга. Таво медводдзаысь фестиваль подулын нуöдiсны «Мича войвывса ныв» коми мичлун конкурс. Вермысьöн лоис Мутнöй Материкысь ныв, Петрозаводскöй консерваторияын велöдчысь Юлия Немчинова.

Мария Мингалева, Коми йöзкостса радио