Дас сизимӧдысь – «мирса юркарлы»

Войвывса войтырлӧн спартакиадаын венласис Россияса да республикаса каръясысь матӧ 1.500 спортсмен. Медводдзаысь ордйысьны волісны Перымса войтыр, а спартакиадалӧн программаӧ пыртісны тхэквондо, винтовкаысь лыйсьӧм да картинг. Сизим лун чӧж Воркутаысь, Ухтаысь, Салехардысь да мукӧд карысь спортсменъяс венласисны гира лэпталӧмын, боксын, варччӧмын, баскетболысь да волейболысь ворсӧмын... Сӧмын лызьӧн да кӧръяс вылын панласьӧмсӧ ковмис вуджӧдны ноябрь помӧ. Спартакиада котыртысьяслӧн кывъяс серти, вывті пӧ сёрӧн Воркутаӧ воис тӧлыс, лымйыс таво этша на усьӧма. Медся уна спортсмен водзмӧстчис Воркутаса командаын – матӧ 200 морт венласисны быдсикас спортын. Турнирлӧн кӧзяеваыс и лоисны вермысьясӧн – войвывса войтырлӧн спартакиадаса кубокыс 17-ысь нин кольӧ «мирса юркарын». Казьтыштам, воркутасалысь сӧмын ӧтчыдысь мырддьылісны вермӧмсӧ. 2014 воын кубокыс вичмис ухтасалы. Мӧд места таво босьтіс Сыктывкарса команда. Коймӧдӧн лоис Ухта. Сэтчӧс спортсменъяс бара на петкӧдлісны, мый баскетболын да волейболын найӧс некод оз ордйы. Кыкнан зарни медальсӧ Усинскысь котыр шедӧдіс автогонкаын, и тайӧ сетіс позянлун «мусирлӧн юркарлы» босьтны нёльӧд места. Войвывса войтырлӧн спартакиадалӧн медвиччысяна гӧсьтӧн вӧлі Олимпиадаса бронзаа призёр Владимир Никитин. Кыдзи сійӧ шуис, меным пӧ зэв нимкодь волыны Воркутаӧ, ӧд ассьым медводдза медальсӧ шедӧдлі войвывса ворсӧмъяс вылын. –2004 воын ме медводдзаысь пырӧдчи тайӧ ордйысьӧмас, а сэсся нин быд во волывлі войвывса спартакиада вылӧ. Тані ме шедӧді спортса мастерлысь ним, и, колӧ пасйыны, сетчис сійӧ меным зэв сьӧкыда. Войвывса ворсӧмъяс – тайӧ ыджыд турнир, коді сетӧ позянлун том йӧзлы пырӧдчыны ыджыд спортӧ, – висьталіс Владимир Никитин. Войвыв кытшса ворсӧмъяс кывкӧрталан концертын петкӧдчисны Воркутаса сьылысь-йӧктысь котыръяс. Асланыс творчествоын найӧ петкӧдлісны войвывлысь сӧвмӧм: каръяс кыпӧдӧм да шахтаяс стрӧитӧм, медводдза уджалысьясӧн из шом перйӧм. Республикаса физкультура да спорт министерствоӧн веськӧдлысь Николай Бережной аттьӧаліс воркутасаӧс гӧсьтъясӧс бура вочаалӧмысь да корис ставнысӧ «Заполярные игры-2017» ордйысьӧм вылӧ. –Быд во тайӧ турнирас пырӧдчӧ пыр унджык морт, на пӧвстын и ыджыд опыта спортсменъяс, и физкультура радейтысьяс. Ворсӧмъясыс видзӧны бур традицияяс, отсалӧны кутны вермасьысьяс костын крепыд йитӧд да ышӧдӧны йӧзӧс сӧвмӧдны дзоньвидзалун. Ми бара на пырӧдчим спортлӧн кыпыд гажӧ да кутам лача, мый спартакиада мӧдас сӧвмыны и водзӧ, – пасйис Николай Михайлович.

Юӧрсӧ дасьтіс "Коми му" газет

Регион: