Помка волыны Изьва

Шулӧны тай, быд лэбач пӧ ассьыс позсӧ ошкӧ. Выльлунӧ локті ичӧт рӧдинаысь, кык вежон сэні вӧлі, да сьӧлӧмӧй бӧр нин кыскӧ. И Турция-Египетыд, кӧні  нэмнас эг вӧвлы, меным весь оз ков. Шойччыны кӧ, Изьваӧ, сӧмын Изьваӧ!..

Мыйла?

Ӧти-кӧ, сэні шемӧсмӧдана да озыр вӧр-ва: чериа ты-ю, звер-пӧткаа парма, мырпома нюр... Дерт, Коми муын татшӧм пельӧсыс уна. Но сӧмын Изьва берегысь Галфедь грезд дорын позьӧ аддзывны дзик гӧгрӧс, зэв      ыджыд изъяс. Му шарас татшӧмыс лыда. Йӧзыс шуӧны, мый инмӧдчылан кӧ на дінӧ, туй вуджан мудзыд здукӧн и бырӧ.

Выныд нӧшта на содас, нуръясян кӧ сэтчӧс вӧлӧгаӧн. Гожӧмын айбарчыд (кын кӧр яйыд) весиг изьвасалӧн овлӧ гежӧд холодильникын. Но кутшӧм чӧскыдӧсь Діюрын вӧчӧм котлет-калбас! М-м-м... Татшӧмсӧ, ёртъяс, ме некор на эг сёйлы. Тасьтіын котлетыс быри да, верми и вилкаӧс нювны. А сэсся паньӧс нюлі, сливки кашникыс кушмис да... Изьваын зэв ёна радейтӧны Ластаса вый. Меным сійӧ воис жӧ сьӧлӧм вылӧ. Асыв и рыт кызіника мавті нянь вылӧ, но «мавтасыд» бырны кутіс, да ыджыдджык вок ӧлӧдіс, вый сё-йысьлӧн пӧ кокыс кынмӧ... Чӧрту, кынмас кӧ, пимиася дай!..

Изьваӧ волысьӧс пыр жӧ чуймӧдӧны кык судтаа важ керкаяс. Забеднӧ, мый вочасӧн налӧн лыдыс чинӧ, но мукӧдыслы кыксё во нин, а век на сись моз сулалӧны. Ӧти на пиысь юрсиктса музей. Пыран пытшкӧсас да «машина времениӧн» моз кад кежлӧ косавлан бӧрӧ кольӧмаас. Мыйыс  сӧмын абу тані?!.

О! Юаланныд, а мый эськӧ Изьваын абу? Ставыс эм, борщевик да клещ кындзи. Адгумыд да пеж гагйыд, слабог, сэтчӧ абу овмӧдчӧмаӧсь. Колӧкӧ, сы вӧсна мый тайӧ муыс вежа.

Вежа и эм! Казьтыштӧй 2010 вося сентябрь 7 лунӧ Изьваын  Ту-154-лысь дивӧ пуксьылӧмсӧ. Енэжын битӧг кольӧм самолётлы, тыдалӧ, Енмыс индіс эндӧм аэропортсӧ. И ӧд некод весиг эз доймав! Кӧч кындзи... Йирсигкості татшӧмтор аддзӧма, да коньӧрӧйлӧн сьӧлӧмыс потӧма.

А нӧшта Изьва нималӧ кӧр да вӧв видзысьяслӧн районӧн. Тайӧс пасйис республикаса Юралысьлысь удж вӧчысь Сергей Гапликов. Ме пӧ быдми вӧвъяс костын да велалі насянь сэтшӧмторйӧ, мыйӧ мортыд некор оз велӧд. Та понда пӧ меным зэв ёна кажитчис тайӧ районыс. Содта: изьваса вӧвъяс тшӧтш торъялӧны мукӧдсьыс найӧ этша сёйӧны да уна уджалӧны. И йӧзыс тані тшӧтш статяӧсь да зільӧсь...

Уп! Талун пӧсь петмӧн уджавсис. «Луд» гаж йылысь на снимайті-гижи. Лыддьӧй...

 Григорий ХАТАНЗЕЙСКИЙ.

Регион: 
Народы: