Гений ГОРЧАКОВ: Олoм радейтысь морт (на коми языке)

Челядьдырыд тай быд мортлы медся муса да шуда кад. И быдöн казьтыштö сiйöс мелi нюмöн да серамсорöн. Коми композитор да гижысь Гений Дмитриевич Горчаков аслас челядьдырсьыс быд шуда здук тöд вылас кутö. Тöдöмысь, эм мый висьтавны внук-внучкаяслы да и тiянлы, дона лыддьысьысьяс. Гений Дмитриевич чужлöма Сыктыв районса Визин сиктын. Сьöкыд кадö быдмöма. Война кадся челядьыд тай öдйö верстяммылöмаöсь, öд налы батьяс да ыджыд вокъяс пыдди ковмылöма уджавны, кынöмпöт перйыны. Гожся каникул дырйи запаньын уджавлöмаöсь, тöвнас мамыскöд пес заптылöмаöсь. Но сьöкыда быдмöмыд да кок йылад сувтöмыд абу чорзьöдöма Гений Дмитриевичöс. Сiйö серам сорöн казьтывлiс ассьыс челядьдырсö. Сыкöд сёрнитiгöн медся ёна шензьöдiс олöмсьыс быд весиг ичöтик лоöмтор помнитöм. Ассьыс быдмöмсö, ворсöмъяссö, весиг ичöтдырся ёртъясыслысь да велöдысьясыслысь нимвичьяссö Гений Дмитриевич кутö вежöрас. Тайö пö и отсалö меным гижны повесьт-висьтъястö. Сьыланкывъясыд на пö артмöны и. Уна лоöмтор гижöдъясас босьтö аслас олöмсьыс. Гений Дмитриевич велöдчöма школаын, сы бöрын Коми пединститутö пырöма. Шудыс вöлöма да драмтеатрбердса театральнöй студияын на тöдöмлун босьтöма. Сэсся 18 во уджалöма Луздор районса Абъячой сиктын, веськöдлöма передвижнöй театрöн. Та бöрын Эжваса культура дворечын директоралöма. Сэсянь и петöма пенсия вылö. Гений Горчаков бать-мамлöн чужлöма куим пи. Но туберкулёзöн висьмöм понда Гелий пиыс зонкаöн на кувсьылöма. Батьыс уджавлöма и избачнас, и милиционернас, и обкомса секретарнас, и «Вöр лэдзысь» газетад на редакторавлöма. Мамыс челядьöс быдтöма, керка гöгöр ноксьöма. — Челядьдырöй да муса кадöй! Кутшöм öдйö тэ исковтiн-визувтiн! Колины сöмын сьöлöм вöр-зьöдана казьтылöмъяс! — кыпыда панiс сёрнисö Гений Дмитриевич. — Коркö батьöс мöдöдiсны велöдчыны Кардорö. Миянöс, челядьöс, вайисны Поёл сиктö, баб дорö. Ме, ыджыдджьшыд, гöгöрвои нин — дыр кежлö колясны. Кор бать-мам пуксисны вов доддяд да вöрзьöдчисны, ме ымзöмöн бöрсяньыс вöтöдны босьтчи. Километр кымын котöртi. Ме бать-мам бöрся котöрта, бабö ме бöрся вöтчö. Сiйö кызiник вöлi да менö суöднысö оз вермы. Сэсся котöртiгад гöптö конъяси да и уси. Вöлисти бабыд менö суöдiс да бöр гортö косöдiс. — Сэсся мöд серпас син водзö локтö, — серам сорöн водзö вись-тасьö Гений Дмитриевич. — Бать-мам тшöкыда кольлывлiсны ичöт вокöс видзны. А коркö вöрö вотчыны мöдöдчисны да зэв водз садьмöдiсны менö. А унмöй сэтшöма локтö! Менам и вугыртсьöма... Бать-мамсянь бара на меным сюри. Кымын арöса вöлi, ог и помнит. Школаас тай эг на велöдчы-а. Гений Дмитриевичлысь батьсö тшöкыда мöдöдлывлöмаöсь командировкаясö. Мукöддырйи некымын во кежлö. Та вöсна и семьяыс уна олан местатö вежлöма. Батьсö ыстылöмаöсь уджавны и Мылдiнö, и Выльгортö, и Сыктывкарö. Уналаад олiгöн быдторйыс вöвлöма. Медся бура Гений Дмитриевичлöн вежöрас кольöма Мылдiнын олöм. Буретш 30-öд воясö... — Коркö Мылдiнö вайисны кино, — нюмъялöмöн казьтылö Гений Дмитриевич. — Мый сэтшöмыс — некод оз гöгöрво. Но ме мамлысь кори жö сьöмтортö да ветлi видзöдлыны дивöтö. Oти морт аппарат бергöдлö, мукöдыс пемыд залын пукалöны да экран вылö видзöдöны. «Немöй» кино тайö вöлi. Помнита «Дочь партизана», «Оса» да мукöд кино видзöдлiм. Мамъясыд быд кино вылö сьöмтö оз вермыны вöлi вичмöдны. Та вöсна сёрнитчам киномеханикыскöд, мый кутам разöдны афишаяс да и аппаратсö бергöдлыны на отсалам. Татшöм ногöн уна кино удайтчывлiс видзöдны. Челядьыд тай пыр аддзöны аслыныс занятиетö. Бара жö Мылдiнад на олiгöн бать менö гусясьöмысь ёна пöвсавлiс. Со мыйысь. Батьяслы пыр вöлi сетöны пистолет да некымын патрон. И сундукö сiйö дзеблывлiс патрон запассö. Ме та йылысь зэв бура тöдi. Орчча сиктсаяскöд ми ёна тышкасьлывлiм. И коркö шуим повзьöдны найöс. Ме батьыдлысь некымын патрон гусялi. Сэсся найöс ми сюялiм бипурйö. И вуджим асланым берегö. Видзöдам, виччысям, мый водзö лоас. Сэсся тай кыдзи патронъясыд лыйыштасны, орчча сиктса зонъясыд повзясны да и пышъясны. А ми: «Вермим ! Ура!» горзам. Сёрниыд тай сиктад öдйö паськалö. Со и батьыд та йылысь тöдмалöма. Ёна и сюралiс меным ышмöмсьыд. Челядь дырйиыд тшöкыда ворслывлiм «Сыркисьыд», «Дурпопсьыд», «Городкисьыд» да «Парусьыд». Вермим кузь лунтыр котравны сикт кузя, корсьысьны ёртъяснымöс. Медводдза классас велöдчигöн батьыс козьнавлöма Гений Дмитриевичлы баян. — Сэки баяныд зэв дона вöлi да и эз сюрлы. Бать менам партийнöй конференциясянь сiйöс вайлiс. Баяныс сьöкыд, мексö паськöдны он вермы выльысла, кизьясöдзыс киясöй оз судзны. Бать эськö ёна кöсйис, мед велöдча. Но эг тай босьтчы, эз вöв баяннад ворсöмыд сьöлöм серти. Сэсся батьöй и вузалiс менсьым баянтö. Бöрыннас нин, кор драмаса актёр студияын велöдчигöн практика вылö мунi Абъячойö, аддзи сэтысь ассьым ба-янöс. Тайö лоöмторйыс, гашкö, и вöлi меным пасöн, мый тайö сиктас котырта медводдза колхозно-совхознöй передвижнöй театр. Дас кöкъямыс во Гений Дмитриевич веськöдлiс Абъячойса театрöн. Уна тöдчана йöзöс петкöдiс сцена вылö. Тайö Н.М. Дьяконов, И.И. Аврамов. Светлана нылыс, кодi öнi веськöдлö шылада-драмаа театрöн, танi жö заводитлiс медводдза рольястö ворсны. Танi Гений Дмитриевич велöдчöма баяннад концертъяс аккомпанируйт-ны. Быдтöма квайт челядьöс. Гений Дмитриевич Горчаков март 9-öд лунö пасйö 80 арöс. Сиам сылы крепыд дзоньвидзалун, дыр на овны да гажöдны миянöс выль сьыланкывъясöн да гижöдъясöн. Гений Дмитриевич некымын кыв висьталiс и лыддьысьысьяслы: — Мед эськö оз вунöдны ассьыныс олан туйвизьнысö, уна лыддьысясны да сöвмöдасны вежöрсö. Ставныслы сиа дзоньвидзалун, кузь нэм да бур шуд. газета "Йолога" (Республика Коми) от 9 марта 2007 года, Надежда МАМОНТОВА
Читайте также:
ВОЙДИТЕ, ЧТОБЫ ОСТАВЛЯТЬ КОММЕНТАРИИ