Книга бордын ужазы редактор Валентина Уразаева но автор Серафима Лебедева

Котькуд калыклэн аслыз гинэ тупась чебер дћсез вань. Нылкышноос, сое вурыкузы, вань тодэмзэс, сюлэм шунытсэс поныны тыршо. Дћсь пыр шќдћське калык психология, дунне шоры учконлэн аспќртэмлыкез.

Удмурт калык дћсез эскерисьёс пќлын нимысьтыз висъяське Кузебай Герд нимо музейын ужась Серафима Лебедева. Та нуналъёсы «Удмуртия» издательствоын потћз Серафима Христофоровналэн туж чебер, яркыт «Удмурт калык дћсь» книгаез.

- Серафима Христофоровна, шуо, та книга бордын, пе, тћ быдэс улондэс ужады, зэм-а?

- Меџак озьы шуыны уг луы, но книгае пырем дћсез мон 1970-тћ арысен бичаны кутски. Отчы пыртћ на Герасим Фёдорович Сидоровлэсь 1930-тћ арысен люкам материалъёссэ. Шаркан ёросэ экспедицие потаса, со туж тунсыко арбериос шедьтћз, трос аръёс ортчыса, ми но та ёросэ вуылћмы, но уноез вунэтэмын, ыштэмын вал ни.

Мынам тужгес но сюлмыя Марий Элысь Мари-Турек ёросысь њаны гурт пала потамъёсы но шедьтосъёсы. Отчы нырысьсэ вуылэме дырысен 35 ар ортчиз ни. Шедьтћ туж тунсыко сюлыкъёс (бадњым кышетъёс). Милям музеямы азьвыл соос воксё ќй вал. Нош али быдэс коллекция.

Азьвыл сюлмы туж шуг луэ вал удмурт пужыятскон понна. Поръёс, чувашъёс вашкала амалъёссэс быгатыса куто туала вакытэ но. Нош асьмелэн уноез вунэмын. Республикаямы Кибашлыослэсь центрзэс кылдытэм бере гинэ удмурт пужыослы тросгес саклык висъяськыны кутскиз.

- Маин висъяське удмурт пужыятскон?

- Вашкала удмуртъёслэн кыџе но вурысъёссы ќй вал! Пужыос туж чебер адскизы. Куд-огзэ учкыса уд но вала, кызьы но кыџе амалъя соос пќрмытэмын. Вань сыџе ужъёс - вылтуссыя туж тупало чильтэрлы, нош чакласькод ке - со чик но чильтэр ќвќл! Кызьы озьы? Нырысь ик дэралэсь сћньысъёссэ кыскаса поттало, басмаез сетка кадь кельто. Нош собере со поттам сћньысэн та дэраез ик пужыято. Дэра но, сћньыс но тќдьыесь. Таџе пужыятскон амал вань калмез удмуртъёслэн гинэ.

- Шуиськом, лымшор но уйпал удмуртъёслэн дћсьсы зол висъяське. Со кызьы шќдћське?

- Лымшоръёс дэремъёсазы турлы-турлы буёлъёсты куто. Уйпалъёслэн дћсьсы тќдьы но пужыятэмын. Нуналлы быдэ нуллон дћсьсэс но таос тќдьы дэралэсь вурылћзы, туж шер гинэ, пудо котыр берганы, кыџе ке кырсь ужез быдэсъяны шуыса, кечато дэрем дћсяло вал.

Киров улосысь Уни ёросысь Выльгуртэ вуылћм. Отын тодматским туж тунсыко песянаен - Анастасия Павловна Золотарёваен. Со милемлы усьтћз сандыксэ. Нош отын тыраз ик лач-лач биньыса тыремын тќдьы дэремъёс. Ай эшшо парен-парен - огшоры дэрем но шорт дэрем. Кышномурт шуэ: бызьыкум, пе, 40 куз таџе дэреме вал. Анастасия Павловна узыр семьяысь вылэм. Етћн сћньысэн пужыятылћллям огшоры нуллон дћсьсэс, буртчин сћньысэн - куное ветлонооссэ.
Дћсез џемысь миськылћллям толалтэ. Котькуд бадњым черкогуртын арнянуналэ ортчо вал ярмаркаос. Отысь басьтылћзы инњы, весь, пќртэм сћньысъёс.

- Удмуртъёсын артэ улћсь калыкъёслэн дћсязы асьмелэсь асэстэм пужыос уг шќдћсько-а?

- Удмуртъёслы матын улћсь башкиръёслэн пужыоссы џемысь укшало асьмелэнъёслы. Тюрк калыкъёс «тамбур» нимаськись вурысэз ярато вал. Нош куд-ог башкиръёс милям пужыятскон амалъёсмылы синмаськиллям. Со дыре ик Башкортостанын улћсь удмуртъёслэн дћсьсы туж тупа башкиръёслы. Но куддыръя туж секыт валаны, кин кинлэсь асэстэм.

- Шаерамы али трос коллективъёс асьсэлы удмурт шќмо дћсь вуро, куддыръя, оло, кыџе ке вашкала пусъёсты, буёлъёсты воксё валатэк куто. Со тћледыз уг љожомыты-а?

- Вакыт воштћське. Валамон ини, быдэсак вашкалаосмы сямен али уд ветлы ни. Но азьвыл пужыосты кутыны луэ, туала дћсьлэсь сќзулзэ, мќля котырзэ чебер пужыятыса. Нош буёлъёсты, малпасько, валасагес ик кутоно, куддыръя воксё тупасьтэмез огинэ биниське. Вашкалаосмы та ласянь визьмоесь вал.

Синмаськисько «Айкай» коллективлы. Кивалтћсьсы Пётр Данилов туж сюлмаське костюмъёссэс чебер карон сярысь. Но мон уг шуиськы, быдэсак «Айкайлэсь» учконо. «Удмурт калык дћськут» книга вылэ пыкиськыса, туала дэрем асьтэ сямен кылдытыны луэ. Ма, со сяна но вань на юрттћсь литература. Тани кемалась ќвќл Людмила Молчановалэн туж чебер книгаез потћз. Отын трос пужыос сётэмын.

- Асьтэ книгаяды тћ возьматћськоды куд-ог чеберъяськон арбериосты но. Нош ќй вал-а мылкыдды соослы сћзем нимысьтыз бичет поттыны? Туала нылкышноос уг тодо, кыџе чебер арбериосты куто вал соослэн вашкала песянай-песятайёссы.

- Зэм, книгаямы ми пыртћмы кќня ке зундэсъёсты, поскесъёсты, уксётћрлыкез. Тросгес ќз луы, угось текстлы но инты кулэ на. Вашкала удмурт дћсьлы, чеберъяськонлы сћзьыса, кќня ке книга поттыны луоно, материал туж трос люкаськемын. Ма, котькуд нимаз дэрем - со книга выллем. Одћг но огкадез ќвќл. Нылкышноос пужыосты ог-огзылэсь басьтылћзы, одно ик чук (кисть) лэсьтыса кельтылћзы. Кибашлы кышномуртлэн ужезлы син медаз усьы, пе. Озьы куд-ог киужъёс, пужыятэм дэремъёс вылын кќня ке чукез луэ.

Али нимаз дэрем лэсьтыса уг курадњо, сое тросэн-тросэн потто. Чеберъяло но мукет сямен. Но вашкала искусствоез тодытэк нокызьы уг луы.

Мон быдэс улонме сћзи музее арбериос люканлы. Азьвыл шуо вал: Россиысь Этнография музейын удмуртъёс сярысь туж њеч коллекция люкамын. Нош али ми соосын споръяськыны быгатћськом. «Удмурт калык дћськут» книгае пыриз музеямы утиськись узырлык пќлысь пичи люкетэз гинэ. Вань на ворсам фондъёсмы но. Шуом, милям туж трос чыртывесьёсмы, азвесь уксётћрлыкмы. Куд-огзэ соос пќлысь калыкез кужмысь колхозъёсы пыртон вакытэ вайизы, куд-огзэ музей ачиз басьтћз. Но со узырлыкмес калыклы возьматэммы уг луы. Со понна нимысьтыз тћрлык но сигнализация луыны кулэ.

Оскисько, куке-соку адямиос тросгес тодматскозы вашкала, чебер удмурт арбериосын. Книгаосысь гинэ уз, музеямы вуылыса. Нош книгаме поттэмзы понна мон «Удмуртия» издательстволы, солэн кивалтћсезлы Юрий Кузнецовлы, книгалэн редакторезлы Валентина Уразаевалы бадњым тау карисько. Соос та уж борды кышкатэк, рос-прос басьтћськизы. Тау кылъёсме кызьы вераны но уг валаськы. Таџе-таџе чебер книгаез киын возён но бадњым шуд ни.

Туспуктэмез авторлэн.

Елена Миннигараева, "Удмурт дунне"