Мари этнодискотекаяс Казаньын

 

Кольöм во став Россия тöдмасис мариечьяслöн поп-культуракöд. Мари этнодискотекаяс вöлі нуöдöмаöсь Москваын, Питерын, Екатеринбургын, Бирскын, Казаньын да мукöд каръясын.

FINUGOR Инфоцентрлы этнодискотека котыртысьяс висьталісны, мый Казаньын нуöдöма нин куим татшöм дискотека. Том йöзöс гажöдісны мари эстрадаса сьылысьяс: Вената, Влад Николаев, Алена Яковлева, Сергей Романов, Dj Андрий-мундрий, а сідз жö  мари эстрадалöн «король» Анатолий Зарецких. Куимнан дискотекаыс вöлі нуöдöма том йöзлöн медрадейтана Казаньса войся клубъясын.

«Миян водзын сулалісны зэв ыджыд могъяс: лöсьöдны бур афишаяс, печатайтны да да разöдны йöзлы билетъяс. Сідз жö миянöс майшöдліс мероприятиелöн  юридическöй «сöстöмлун». Ми лöсьöдім печатьяс да колана документъяс», - висьталіс миянлы Надежда Макарова.

Став мытшöд венöм бöрын Казаньын вöлі нуöдöма медводдза мари дискотека. Кадпаснас вöлі бöрйöма вöльгым 18 лун. Гаж котыртысьяс юöр серти, дискотека муніс зэв бура. Клубын вöліны не сöмын мариечьяс, но и Татарстан юркарса мукöд национальностя войтыр. Тані жö вöлі шуöма нöшта нуöдны некымын татшöм мероприятие.

Мöдöд дискотека вöлі сиöма Выль вося гажлы. Нуöдісны сійöс öшым 23 лунся войын. Сэні сідз жö сьылісны мари эстрадаса «кодзувъяс».

Коймöд дискотека муніс урасьöм 18 лунö да вöлі сиöма став радейтысьяслöн лунлы.

Гаж котыртысьяс эскöдöны, мый татшöм дискотекаяс Татарстан юркарын ношта на лоöны.

 

Игорь Игнатов, Инфоцентр FINUGOR