Матысса кык воӧн Сыктывдінса Ыбын финн-йӧгра этнопарк сӧвмӧдӧм вылӧ шуӧма вичмӧдны 903 миллион шайт.

Матысса кык воӧн Сыктывдінса Ыбын  финн-йӧгра этнопарк сӧвмӧдӧм вылӧ шуӧма вичмӧдны 903 миллион шайт.

Регионса власьтъяс юрнысӧ жуглӧны, мый вӧчны та весьтӧ этнопаркас, медым республикаын олысьяслы да налӧн гӧсьтъяслы медбӧрти мусмис тайӧ  шойччаніныс. 

Сергей Гапликов  вӧзйӧ «овмӧдны» сэтчӧ Лымнылӧс. Сы дорӧ гӧститны волысьыс пӧ  лоас Великӧй Устюгын Мороз пӧль ордӧ  дорысь унджык.

Кыдзи ті чайтанныд, отсалас тайӧ ловзьӧдны этнопаркын йӧзкӧд уджсӧ?

 

Михаил Челпанов,

физкультура да спорт министерствоын зільысь:

Лымнывлӧн резиденция эм нин Кострома обласьтын, и мыйла татшӧмсӧ лӧсьӧдны Ыбын? Ӧд миян эмӧсь и асланым геройяс, кодъясӧс позяс «овмӧдны» этнопаркӧ: Кӧрт Айка, Пера Багатыр, Зарни Ань да мукӧд.

Отсалас-ӧ тайӧ «ловзьӧдны» этнопарксӧ? Сьӧкыд висьтавны...  Лымнывлӧн «оланінӧ» окота лоӧ ветлыны семьяӧн, но та вылӧ этнопаркын абу сідз шусяна инфраструктураыс, да и мунны сэтчӧ матӧ 60 километртӧ оз быдӧн окотит.

 

Ирина Ульнырова, школаын велӧдысь, Усинск:

Кымын во нин чинаяс мырсьӧны, медым «ловзьӧдны» этнопарксӧ. Видзӧны уна сьӧм, корлывлӧны Россияса эстрадаысь «кодзувъясӧс», а тӧлкыс абу.

Неважӧн ме гӧститі Кулӧмдін районын, и сэтшӧм мича вӧр-васӧ, ыджыд сьӧлӧма йӧзсӧ да озыр культурасӧ ме некӧн сэсся эг аддзыв. Чайта да, оз ковны миллиардъяс, медым видзны комилысь культурасӧ да оласногсӧ. Ставыс тайӧ эм нин сикт-грездын. Сӧмын тай сьӧкыд воӧдчыны сэтчӧ, туйныс шогмытӧм, а дзоньтавны сьӧмыс абу...

 

Алексей Быч,

Сыктывкарса чипан видзан фабрикаын зільысь:

Кор заводитісны кыпӧдны Ыбын этнопарксӧ, унаӧн сэки нин эз эскыны, мый йӧзыс кутасны ветлыны сэтчӧ шойччыны, ӧд карсяньыс матӧ 60 километр сайын.

Ачым ме ветлі этнопаркас сӧмын ӧтчыд, «Ыбица» вылӧ, но лолӧй эз и кыпавлы. А мыйта нин сьӧм видзисны этнопарк вылас бюджетысь? Чайта, сылӧн доныс некор оз вештыссьы, и некутшӧм Лымныв оз отсав.

 

Артём Кузнецов, школаын велӧдчысь, Сыктывкар:

Дзик ковтӧм мӧвп. Кыпӧдісны этнопарксӧ,  а туристъяс кыдзи эз вӧвны, сідзи оз и волыны. Да и Сыктывкарся-ньыс ылын. Коліс эськӧ матынджык вӧчны. И 903 миллионсӧ бара на «тӧв йыв» лоӧ  шыбитӧма.  

 

Любовь Лапина, тележурналист, Сыктывкар:

Ме думысь, Ыбса этнопарксӧ и збыльысь колӧ выль-мӧдны, мыйкӧ вежны сылӧн уджын. Колӧны выль мӧвпъяс.  А ӧні сэтчӧ лыда морт волывлӧ.    

 

Нина Обрезкова, коми гижысь, Сыктывкар:

ЛымнылыдКӧдзыд пӧльлӧн внучка, сы дорӧ мича содтӧд. И овмӧдны сійӧс финн-йӧгра этнопаркӧ ӧтнассӧ? Чайта,  тайӧ  шемӧсмӧдас унаӧс. 

 

Эдуард Пименов,  журналист, Кӧрткерӧс сикт:

Матӧ миллиард шайтсӧ колӧ видзны регионын туйяс дзоньталӧм, а оз этнопарк сӧвмӧдӧм вылӧ.  Миян республикаын эм уна пельӧс, кытчӧ позьӧ ветлыны шойччыны, нимкодясьны вӧр-валӧн мичлунӧн, коми войтырлӧн аслыс-пӧлӧслунӧн, тӧдмасьны налӧн культураӧн  да традицияясӧн. Но туйяс абутӧм вӧсна уна сикт-грездӧ туристыд оз вермы воӧдчывны.

А Лымнылыд ӧд олӧ нин Костромаын. Сэсся и ӧд асланым эм, кодӧс овмӧдны этнопаркӧ. Шуам, Пера Багатырӧс либӧ Зараньӧс. 

 

Антонина Борошнина,  журналист, Воркута:

Неважӧнсянь ме дзикӧдз нин дугді эскыны да надея кутны,  мый Комиын кутас сӧвмыны туризм. Шуам, миян карын коркӧ кӧсйысьлісны вӧчны ВоркутЛАГлысь музей.  Сёрнитісны уна, но ставыс сёрниӧн и колис. Но 903 миллионыд вермас тӧдчымӧн сӧвмӧдны этнопарксӧ. 

 

Раиса Шахова, госслужащӧй, Сыктывкар:

Сергей Гапликовлӧн тайӧ вӧзйӧмыс висьталӧ сы йылысь, мый финн-йӧгра этнопаркӧн веськӧдлысьяслы пырысьтӧм-пыр колӧ вежны уджаланногсӧ. Кымын нин директор сэні вежсис, а тӧлкыс абу. Талун этнопаркыс вайӧ сӧмын рӧскод.

Regions: 
Народы: