Виччысьтӧм кывкӧртӧд

Францияын помасис футболӧн ворсӧм кузя Европаса чемпионат. Сійӧ колис миян паметьӧ командаяслӧн «дорйысян» ворсӧмӧн, фанатъяслӧн тыш-косьӧн, турнирыслӧн виччысьтӧм кывкӧртӧдӧн... Неуна казьтыштам, кыдзи муніс чемпионатыс, кодӧс сэтшӧма виччысисны футболӧн «висьысьяс». Футболӧн «висьысьяс» «Евро-2016» заводитчис фанатъяслӧн тышкасьӧмсянь. «Водзмӧстчисны» тшӧтш и миян «висьысьяс», кодъяс турнирлӧн медводдза лунъясӧ косясисны англиясакӧд. Та понда УЕФА перйис Россияса футболистъяслӧн союзлысь 150 сюрс евро штрап да муртса эз вӧтлы миянлысь сборнӧйсӧ ордйысьӧмсьыс. Бӧрынджык Европаса Сӧвет кырымаліс сідз шусяна конвенция. Сы серти футболӧн «висьысьясӧс», кодъяс торкалӧны оланпас, оз кутны лэдзны мукӧд странаӧ. Россиялӧн ворссьӧм Уна нин та йылысь висьталӧма да гижӧма. Медводдза матчын сборнӧйлы мойвиис ворсны Англиякӧд 1:1 тшӧтӧн, мӧдас ворссисны словакъяслы, а коймӧдас найӧс пасьвартісны уэльссаяс. Ворссьӧм бӧрас спортын пыдди пуктана йӧз да асьныс футболистъяс кутісны мӧвпавны, коді мыжа да мый вӧчны. —Татшӧм миян футболыс. Колӧ мыйкӧ такӧд вӧчны, ӧд миян сборнӧй абу нин том, и сэні оз тырмы ыджыд сяма футболистыс. Здукӧн ставсӧ вежны бурланьӧ, дерт, оз артмы, но странаса чемпионат колӧ вынсьӧдны, и суйӧрсайысь выль йӧзӧс быть жӧ лоӧ корны. Позьӧ шуны, та пӧрйӧ 6-7 морт медводдзаысь паныдасисны да эз вермыны венны став мытшӧдсӧ. Мукӧдыслы, тыдалӧ, дыш котравнысӧ да водзмӧстчынысӧ, а ворсігад тадзи оз позь, — пасйис валиечьяскӧд ворссьӧм бӧрын Россияысь спорт министр Виталий Мутко. Кор 2015 воын сборнӧйӧн веськӧдлыны босьтчис Леонид Слуцкий, унаӧн эскисны, ӧні пӧ ставыс артмас. И медводдза кадсӧ ӧд збыльысь бура ворсісны. Унаӧн нин мӧвпалісны, Россияса тренерыд пӧ этшсьӧдіс дыш футболистъястӧ. Но, кыдзи тыдовтчис, мыжанас вӧлӧма абу сӧмын воддза тренерыс — Фабио Капелло. —Уджыс менам эз артмы. Чайта да, 2018 вося мирса чемпионат кежлӧ сборнӧйсӧ колӧ дасьтыны мӧд мортлы. Ме вӧчи ставсӧ, мый верми. Тыдалӧ, омӧля на водзмӧстчи. Окота корны прӧща татшӧм ворсӧмысь футбол радейтысьяслысь. Ставсьыс мыжа ме, — висьталіс Леонид Слуцкий. А гашкӧ, абу сӧмын Леонид Викторович мыжа. Футболистъяс дышиника чужъялісны мачсӧ, эз окотапырысь котравны. Ворссьӧм бӧрын стадион вылын фанатъяслысь прӧща корис ӧтнас Игорь Акинфеев, мукӧдыс «дзебисны нырнысӧ» вежсян жырйын. И абу дивӧ: мыйла нӧ миллионеръяслы котравны ордйысигӧн, кор быдӧн на пиысь вонас босьтӧ 150-200 миллион шайт. Такӧд йитӧдын Госдумаса депутатъяс вӧзйисны чинтыны футболистъяслы удждонсӧ, а ӧтуввезйын вӧзйӧны кырымавны петиция. Сы серти Россияса ӧнія сборнӧйсӧ корӧны разӧдны. Пасъям, кырымалӧма сійӧс матӧ нин 900 сюрс морт. Дерт, лёк, мый сборнӧйным сэтшӧм шогмытӧма ворсіс Европаса турнирын. Но та бӧрын лои гӧгӧрвоана: колӧ восьтыны туй том футболистъяслы да корсьны тренерӧс, коді удитас дасьтыны сборнӧйсӧ мирса чемпионат кежлӧ. Сійӧс ӧд 2018 воӧ нуӧдасны Россияын. Исландия Тайӧ сборнӧйыс воӧдчис сӧмын четвертьфиналӧдз, но сы йылысь быть колӧ висьтыштны. Исландия, кӧні олӧ 323 сюрс морт, таӧдз некор на эз ворслы та ыджда турнирын. И колӧ пасйыны, сэтчӧс мач котрӧдлысьяс петкӧдлісны бур футбол, вермисны Англияӧс да Австрияӧс, ничьяӧн ворсісны Португалиякӧд да Венгриякӧд. Исландияса сборнӧйын ыджыд удждонсӧ некод оз босьт, но та вылӧ видзӧдтӧг став вынсьыс «тышкасисны» быд мач вӧсна да тӧвру моз лэбалісны эрд вывті. Кӧть футболистъяс и эз лоны вермысьясӧн, гортаныс найӧс сьӧлӧмсяньыс аттьӧалісны бура ворсӧмысь. Португалия Кыдзи тӧданныд нин, Португалия лоис футболӧн ворсӧмын Европаса чемпионӧн. «Viva Portugal!» — горзӧны «висьысьяс». Тешкодь, но турнир заводитчигас да сылӧн мунігас унаӧн эз эскыны, мый Португалия лоас вермысьӧн. Ӧд ворсӧмыс налӧн тшӧкыда эз артмыв: сизим матчысь квайтсӧ Португалия вермис сӧмын содтӧд вичмӧдӧм кадын. 2004 воын Европаса чемпионатыс вӧлі Португалияын. «Турнирса кӧзяинъяс» кокньыда вермисны мукӧд котырсӧ да воӧдчисны финалӧдз. Сэки футболын югзис выль «кодзув» — Криштиану Роналду. Но сэки налы эз мойви босьтны медводдза местасӧ, вермӧмсӧ налысь «мырддис» Греция. И став мирыс аддзыліс, кыдзи бӧрдӧ Роналду. 12 во мысти ми бара аддзылім сылысь синвасӧ: первойсӧ доймӧм бӧрас, а сэсся, кор вермисны португалечьяс. Кыдз пасйисны комментаторъяс да футболын нималана йӧз, Португалия пӧ тавося финалын моз некор на эз ворслы. 24-ӧд минутын дойдісны мирса медбур футболистӧс — Криштиану Роналдуӧс. Португалияса капитанӧс нуисны эрд вылысь. Гартӧм кокӧн сійӧ ветлӧдліс эрд бердтіыс да ышӧдіс ёртъяссӧ ёнджыка «личкыны» французъясӧс. 90 минутыс эз тырмы, медым тӧдмавны Европаса чемпионӧс, и сӧмын содтӧд кадӧ Португалия восьтіс тшӧтсӧ. Францияса футболистъяс эз нин вермыны асланьыс бергӧдны ворсӧмсӧ, да Португалия медводдзаысь лоис Европаса чемпионӧн. "Коми му" юӧр серти. Снимокъясыс ӧтуввезйысь.

Регион: 
Народы: 
Автор материала: