Тайö рубрикаын ми йöзöдам «Менам зарни небöг куд» конкурсын коймöд места босьтысьяслысь уджъяснысö. Быд мортлöн небöг лыддьöм бöрын чужöны мöвпъяс, буретш наöн и юксьöны миянкöд том лыддьысьысьяс. «Мый олöм сетö, ставсö тэкöд примитам. Сир курыд шогысь шöйö огö вошöй. Ён кöдзыд талун сьöлöмöдз кö имитö, То аски воас дзоридзьяса гожöм.» Ми, öнiя том йöз, олам выль олöмын, лöсьыда, шоныдiнын. Коркö вöлi «Войвыв кодзув» журналын йöзöдöма статья: «Алöй лента» романлы 60 во». Ме сюся лыдди и гöгöрвои, мый тайö лöсялö коланлун серти öнiя олöмлы. Романлы регыд тырас 70 во, а тöдчанлуныс оз и вежсьы. Василий Юхнин медводдза коми романын петкöдлiс коми сикт, уджалысьясöс, нартитысьясöс, национальнöй традицияяс. Быд олысьлöн эм аслас ним да ов. Романын синмö шыбитчисны коми овъяс. Кор мöвпыштiмыйла татшöм овъяс сетöма автор, гöгöрвои: Ошлаповъяс - ош, коми йöзлöн выныс, мичлуныс, а Сирвойтов - сир, лемасьысь, мыйысь оз позь мынтöдчыны. Важ йöз шуöм серти, сир колö, медым вöчны пыж. Пыжъяс вöлiны ёнджыкасö озыръяслöн. «Алöй лента» - коми йöзлöн 1917 воöдз олöм йылысь медводдза ыджыд, уна гöрöда гижöд. Роман артмис 2 юкöнысь. Меным матыссаджык 1 юкöн. Гижöдын кöсъя видлыны 3 нырвизь: кутшöм тöдчанлун гижöдлöн 50, 20 вояс сайын и öнiя кадын. Менам сёрнитысьяс - коми прöстöй йöз, на пиын эмöсь коми кыв велöдысьяс. Со кутшöм видзöдлас романлöн 50 во сайын: «Коми литература сöвмис фольклор подулын. Тайö роман - коми крестьяналöн культура, олöм, чужанiн, коми национальнöй характер петкöдлöм. Ме ола Койгорт сиктын, а танi сиктлöн нимыс - Важгорт. Юхнин кужöмöн петкöдлöма коми нимъяс. Важöн коми йöз овмöдчывлöмаöсь ю дорын. Ю вердiс, юкталiс. Сиктъясын эз вöвны туйяс, ставсö вайисны карысь ютi. Роман лыддьöм бöрын кажитчö, мый тэ ачыд сэнi олан. Пыравлам коми керкаö. Ичöт, нёль пельöса, краситтöм джоджъяс, ыджыд роч пач, кöнi мамъяс да пöчьяс пöжалöны шаньга. Быд керка вöлi миян сиктын, кыдзи Ошлаповъяслöн. Паныдасьлöны татшöм керкаяс и öнi на. Ми ичöтсянь велалiм овны паччöрын. Паччöр вылын косьтам кöлуй, шойччöдам лысьöм, висьталам öта-мöдлы мойдъяс. А кутшöм оланiн Сирвойтовлöн? Налöн керка пытшкöсыс озыр, шпалеритöма, краситöм джодж, ситеч дöраысь занавесъяс. Ми казялам, мый найö озырöсь. Ичöт дырйи сöмын прöйдитлiм татшöм керка дiнтi. Роман лыддьöм бöрын паметьö колисны коми йöзлöн праздникъяс. Уна сёрнитöны коми национальнöй характер йылысь. Коми йöз кужöны гажöдчыны, уджавны, вöравны... А мортлöн таын и шудыс. Ньöжйöник заводитöны вунны гажöдчöмъяс. А сэки ми пыдди пуктiм пöль-пöчлысь традицияяс. Видзöдлам вöралысьяслысь праздник - Пöкрöв лун. Тайö луныс овлö и нывбаба гожöм бöрын, кор пуксьöны зэра лунъяс. Став вöралысьыс чукöртчöны, медым сёрнитыштны кыйсьöм йылысь, висьтавны выльторъяс, гажöдчыштны. Oнi вунöдöны нин татшöм гажöдчöмъяссö. Коми культура ньöжйöник, но кусö. Том йöз оз кöсйыны овны, кыдзи налöн пöль-пöчьяс. «Алöй лента» романын петкöдлöма кöлысьлысь обрядсö. Юхнин стöча петкöдлö йöзкостса традицияяс. «Кöлысь дырйи невеста эз пасьтав еджыд платтьö, сöмын вöлi мичтор — чышъян. Тадзи и сетлiсны верöс сайö.» А со мый висьталiс менам пöль. Ичöтсянь велавлöма радейтны вöр-ва, пемöсъясöс. Романын, дерт жö, тайö ставыс эм. Автор оз кеж збыльсьыс, петкöдлö ывла выв, вöралöм, олöм. Юхнин стöча восьтö коми вöралысьлысь олöмсö. - Ме быттьö выльысь и выльысь прöйдита аслам чöс туйтi, казьтывла вöрса керкаöс, - сёрнитiгöн пöльлöн петiс синва войт. - Коми муын вöр-ваыс вöлi дзик мöд. Тыяс озырöсь чериöн, сынöд сöстöм. Ми кöсйим лоны Илья кодьöн. Вöрын эгö полöй мунны ош кыйны, а öнi öти казялöмысь повзя. Быд кыйсьысьлöн аслас пон. Кор вöлi томöн, эг кужлы бöрйыны понсö. «Алöй лента» романын петкöдлöма пон бöрйöм. Кыйсьыны ветлi вежонöн, пöтка уна, но пыр пöткатö босьтан некымынöс. Роман велöдiс менö овны, радейтны вöр-ва, пыдди пуктыны пöль-пöчьяслысь традицияяс. Мед олас вöр-ва олöмöн, гöгöр кылас лэбачьяслöн сьылöм, мед том йöз босьтiсны сöмын бур качествояс, кыдз Ильялöн. Мам школасö помавлiс 20 во сайын. Со кутшöм мöвпъяс роман лыддьöм бöрын: «Кутшöм повтöмöн вöлiны Илья да Вера, уджачöн, öта-мöдсö радейтысьöн — ставыс колö ас местаö. Романлöн нимыс петкöдчö кык вежöртасын: öтикыс — Вералöн да Ильялöн радейтчöм. Но ми сэки эг и лысьтлöй та йылысь мöвпавны, бать-мам стрöгöсь. Вöлi мöд воспитание. Мöд вежöртас — мездлунлöн да пролетарскöй öтувтчöмлöн пас. Илья козьналö Вералы алöй ленточка. Роман мöд юкöнын ленточкаысь вöчöны демонстрация вылын лестукъяс. Ми дырйи 7 ноябрын тшöтш вöлi демонстрация. Праздник кежлö лöсьöдалiм лестукъяс, гöрд флагъяс. Миянлы тайö вöлi кыв кутанаöн. Гашкö, öнöдз и татшöм воспитаниеыс коли. Пемыд коми йöз вежсисны. Ми пыр кöсйим воны югыдлань, вежны важ гöрöдсö. А мый лои? Кыдзи Илья аслас ёртъяскöд ветлö Уралö, сiдзи коми войтыр пышйöны коми сиктъясысь каръясö ыджыд деньга-сьöм ради. Коми сиктъяс бырöны. А мый нин сёрнитны коми традицияяс йылысь, мортлöн характер йылысь. Роман лыддя быд во. Некымынысь петкöдлiсны телевидение пыр. И быдысь ме веськала сьöкыд но бур олöмö. Татшöм гижöдыс коми литератураын, медым мунны сэтшöм туйтi, кыдз Илья да Вера.» Со ми прöйдитiм став кадколастсö. «Алöй лента» роман лыддисны, лыддьöны и кутасны лыддьыны том и пöрысь войтыр. Юхнинлöн могыс лои пöртöма олöмö - петкöдлыны мортöс аслас кад серти, збыльтор. Роман - памятник коми сиктлы. Войтыр мед некор эз пышйыны каръясö, колö тöдмöдны В. Юхнин, Г. Юшков, Н. Куратова творчествоöн. Челядьлы колö лоны Илья да Вера кодь. Мед быд коми йöзлöн дöлалiс алöй ленточка, вайис шуд, дзоньвидзалун. Колö меным водзö нуöдны пöль-пöчлысь традицияяс, не сетны куштыны вöр-ва. Колö видзны ичöт сиктъяс, тöдны вужъястö. Важтöг оз вермы лоны выльыс. Юхнин петкöдлiс кутшöм культура вöлi, и мый эм нин — оз ков воштыны. Кыдзи дзоридзьяс то чужöны, то кулöны — миян олöмын тайö и артмö. Том войтырлы колö гижны оланпас, медым важсö не воштыны. Дмитрий ТЕРЕНТЬЕВ, Койгорт районса Койгортса шoр школаын 9 класса велoдчысь газета "Йöлöга" от 23 августа 2007 года