Мед ёнмӧдны дзоньвидзалун

Август 13 лунӧ Сыктывкарын мунісны Физкультурниклӧн лунлы сиӧм ордйысьӧмъяс. Спортлысь кыпыд гажсӧ восьтігӧн республикаса физкультура да спорт министерствоӧн веськӧдлысь Николай Бережной пасйис: —Тайӧ праздникыс ӧтувтӧ спорт радейтысь да дзоньвидза оласногӧ нырччысь войтырӧс. Талун ми нимӧдам найӧс, кодъяс шедӧдӧны спортын гырысь вермӧмъяс, кодъяс отсалӧны мукӧдлы ёнмӧдны дзоньвидзалунсӧ, содтыны выннысӧ, пельклунсӧ. Праздникӧн тіянӧс! Матӧ 200 морт видлісны сдайтны ГТО норма, ӧд сійӧ отсалӧ ёнмӧдны дзоньвидзалун, а кодлыкӧ лоӧ и спортӧ медводдза воськолӧн. Торйӧн кӧ, муниципалитетъясса да юркарса администрацияясын зільысьяс асланыс примерӧн петкӧдлісны, мый быдӧн вермас пырӧдчыны спортӧ. Сідз, вӧлі нуӧдӧма торъя спартакиада, кӧні найӧ петкӧдлісны ассьыныс винёвлунсӧ да видлісны шедӧдны ГТО значок. А сэккості «Северная Олимпиялӧн» йи вылын паныдасисны мача хоккейысь ворсны радейтысьяс. Мед кӧть ордйысьӧмыс вӧлі ёртасяна, зонъяс збоя босьтчисны котрӧдлыны мачсӧ. Найӧ быттьӧ лэбалісны йи вывтіыс, тренеръяс ыззьӧдісны налысь ярлунсӧ, а висьысьяс окотапырысь видзӧдісны пӧсь тыш-венсӧ. Вермысьӧн лоис «Водник» котыр, коді сьӧкыд финалын мырддис вермӧмсӧ «Зоркий» командалысь. Таысь ӧтдор спорт радейтысьяс пӧттӧдз ворсісны дартсысь, шахматысь, каръясьӧмысь. «Спортивная» исласянінын матӧ 50 морт котӧртіс кросс: мужичӧйяс — кӧкъямыс, а аньяс да ветеранъяс — вит километр. Медся ӧдйӧ финишӧдз воӧдчисны Максим Когут да Раиса Головина. Сыктыв юдорса лыа вылын котыртлісны волейболысь ворсӧм. Тайӧ ордйысьӧмас пырӧдчис матӧ 50 спортсмен. Кыдзи пасйисны гаж котыртысьяс, зэв пӧ вӧлі нимкодь аддзыны сы мында йӧзӧс. Тайӧ пӧ петкӧдлӧ, мый пыр унджыкӧн нырччӧны спортӧ, мед ёнмӧдны дзоньвидзалун.

Регион: 
Автор материала: