Выль ар уез ортчытомы удмурт кырзанъёсын. Геннадий Бекманов, Ольга Зорина, Валентина Пудова, Анна Плотникова, Андрей Ураськин, Геннадий Ганьков но трос мукет кырзасьёс "Мынам Удмуртие" телеканалэз учкисьеслы шулдыр мылкыд кузьмалозы. "Дэмен выль арен" концертэз чагыр экранъесысь учкыны луоз уйшор бере — 12 час но 5 минутэ.
"Мынам Удмуртие" телеканал котькуд выль ар уе удмурт учкисьесызлы бадзым кузьым лэсьтылиз. Крезьгуро фильмъес котькудиз сямен юртэ капчи, шулдыр мылкыд вуттизы. Вуись выль ар но портэм уз луы. Портэм луоз кузьым гинэ.
СВЕТЛАНА КИБАРДИНА АЛЕКСЕЙ ЛОЖКИН "ДЭМЕН ВЫЛЬ АРЕН" КОНЦЕРТЭЗ НУИСЬЁС:
"Милям ваньмыз вань та передачаын. Вань милям политика, тордос, эротика, философия. соин ик шуисько, учке милемыз котьку но."
Таяз учыре Выль ар кузьым бадзым пормыны кулэ — "Мынам Удмуртие" телеканал борды итисько удмурт культурая "Дэмен" огазеяськон но удмурт театр. Театр сцена вылын выль арлы сизем концертъес йылоллы пормемын ни — 7-ти арзэ ортчо. Нош сое учкыны мылкыд карисьеслэн лыдзы уг сины. Таяз учыре сое ваньзы учкыны быгатозы.
АНДРЕЙ УРАСЬКИН УДМУРТ КУЛЬТУРАЯ "ДЭМЕН" ОГАЗЕЯСЬКОНЛЭН ТОРОЕЗ, УДМУРТ ЙОСКАЛЫК ТЕАТРЕН КИВАЛТИСЬ:
«Мон уг тодиськы кыче со пормоз телевизор дорын учкыса, но ми тыршим постановочной группаен, театрысь артистъесын шулдыр, шуныт мылкыдо мед луоз та концерт но, та жыт но."
Шаерын улисьес капчияк карисько но удмурт эстрадаысь яркыт кизилиослы оскисько — кин соос сяна выль ар кутскон азьын мылкыдэз жутоз? Театр сцена вылын ваньзы огинын — маскарчиос но, эктисьес но, кырзасьес но. Котькудиз кузьымен лыктэмын.
АННА ПЛОТНИКОВА ЭЛЬКУНЫСЬ СИЁ-ДАНО АРТИСТКА:
"Котькуд адями яратэ кузьым басьтыны но, куьмаськыны но. Выль кырзанъёсме но ваи, ваи сооссэ но, кудъессэ ярато мынам кылзисьесы."
ВАЛЕНТИНА ПУДОВА РОССИЫСЬ КАЛЫК АРТИСТКА:
"Туж сюлэм гань-гань луэ, куке тодмо кырзанэз но кылиськод ке, выль кырзанэз но. Мон озьы ик адямиослэсь яратон кырзанъессэс но кырзало, выльессэ но кузьмало."
Валентина Пудова выль ар уе тодматоз пиеныз — учкисьеслы соос чошен чебер кырзан сизезы. Яркыт кизилиосын чош сценаез шулдыртозы егитес но. "Дэмен выль арен" телепроект эфире потоз выль арлэн кутсконаз — 12 час но 5 минутэ.
Лена Слесарева, Олег Кропачев, “Мынам Удмуртие” телеканал
