Туннэ элькунамы укмыс ёрос газетъёслэн удмурт кылын ватсэтъёссы пото. Можгаын печатласькисез «Выль даур» нимаське. Солэн нырысети номерез "Социализме" нимын 1930-ти артын 1-ти оштолэзе 300 тиражен потиз вал. Борысь "Ленинъя", "Можга иворъес" шуыса печатласькиз, нош берло 15 арзэ "Выль даур" ним улын потэ. Туэ "Можгинские вести" ёрос газетлэн удмурт ватсэтэзлы 80 ар тырмоз.
Нырысети нуналъессэ "Выль даур" газетэз дасян бордын тырше Галина Алёшкина. Солэсь азьвыл вань мылкыдзэс сётыса ужазы Алевтина Пудова но Мария Никитина. Галина Михайловна но осконэн басьтиськиз выль уж борды.
ГАЛИНА АЛЁШКИНА МОЖГА ЁРОСЫСЬ "ВЫЛЬ ДАУР" ГАЗЕТЛЭН КЫЛКУТИСЬ СЕКРЕТАРЕЗ:
"Та уж мыным тодмо маин — мон радиоын ужай бере, микрофонэн адямиос доры потаме вань. Ушъяськытэк-а мара вераны быгатисько, адямиослэсь сюлэмзэс усьтыны быгатисько, соин ик мыным со капчи."
Азьвыл аръесы но, туннэ но газетлэн пуштросэз оз воштиськы — со гожъя огшоры ужась, будись адямилэн улэм-вылэмез сярысь.
ГАЛИНА АЛЁШКИНА МОЖГА ЁРОСЫСЬ "ВЫЛЬ ДАУР" ГАЗЕТЛЭН КЫЛКУТИСЬ СЕКРЕТАРЕЗ:
«Выль даур» пичиослы но мойыослы но мед лыдзозы шуыса. Нырысети бамаз иворъес пыртиськом, кудъесыз значимой городлы но ерослы но мед луоз."
Нош кыкети бамыз творчестволы сиземын, вань мылкыд карисьеслэсь отчы кылбуръессэс, веросъессэс печатлало.
ЛАРИСА МАТВЕЕВА МОЖГА ТЕЛЕВИДЕНИЫСЬ ЖУРНАЛИСТ:
"Мон ачим но гожъяськыны кутски вал со газет бордысен. Азьло со "Можга иворъес" шуыса потэ вал. Печатлай кылбуръес, заметкаос. Егитъес понна кулэ."
ЛЮЦИЯ ВЛАДИМИРОВА МОЖГА ТЕЛЕВИДЕНИЫСЬ ЖУРНАЛИСТ:
"Та газетэз лыдзисьес анай кылэз уг вунэто. Та газет пыр карамы но еросын но ортчись ужрадъесын тодматско. Мыным туж тунсыко потэ та газет. Пиналъес, кудъесыз гожъяло та газетэ, нырысети чуръессэс возьматыны быгато та газет пыр."
Галина Алешкиналэн сюлмаськонэз но вань. Вал аръес, ку "Выль даурлэн" тиражез сюрс котырын возиськиз.
ГАЛИНА АЛЁШКИНА МОЖГА ЁРОСЫСЬ "ВЫЛЬ ДАУР" ГАЗЕТЛЭН КЫЛКУТИСЬ СЕКРЕТАРЕЗ:
"308 тиражен гинэ поттиськом. Со толэзяз 2 пол гинэ потэ, соин ик лыдзисьеслэн тунсыксы усе. Арнялы 1 пол потысал ке, со орысь ой усьысал. Табере 2 арняен вис луэ бере, вунэтысагес кошке лэся, пырасьес но ожыт луизы, тиражез но усиз."
Туннэ та сюлмаськон можгаослэн гинэ овол. Вань удмурт кылын потись газетъеслэн секыт дырзы. Со асьме бордысь ик уг поты-а меда. Анай кылмылы ожыт саклык висъяськом.
Светлана Добрякова, Василий Хохряков, «Мынам Удмуртие» телеканал
