Туйсӧ восьтісны, но эз быдӧнлы

Июль 24 лунӧ МОК шуӧма лэдзны миянлысь сборнӧйнымӧс Рио-де-Жанейроӧ. Но быд спортсменӧс видлалас-донъялас федерацияыс да кывкӧрталас, позяс-ӧ сылы петкӧдчыны мирса ордйысьӧм вылын. Таысь ӧтдор став спортсменсӧ виччысьӧны допинг вылӧ выль тестъяс. МОК-лӧн кывкӧртӧд бӧрын лои гӧгӧрвоана: легкоатлетъяс оз веськавны Олимпиада вылӧ. На пӧвстысь страналысь ним дорйыны мунас сӧмын Дарья Клишина. Таысь ӧтдор Бразилияӧ оз мунны спортсменъяс, кодъясӧс таӧдз «кутлісны» нин вын содтан препарат юӧмысь. Чина войтыр, кодъясӧс пасйылӧмаӧсь допинглы паныд тышкасян мирса агентстволӧн юӧрын, Рио-де-Жанейроӧ оз жӧ веськавны. Кольӧм лунъясӧ суйӧрсайса журналистъяс йӧзӧдісны нин юӧр, Россияса сборнӧйӧ пӧ вермас пырны сӧмын 40 морт, ӧд кызвын спортсменсӧ федерацияыс оз лэдз. МОК-лӧн татшӧм кывкӧртӧдӧн Россия, позьӧ шуны, водзвыв колис медальястӧг. Ӧд Олимпиада вылӧ оз мун Елена Исинбаева, коді тавося чемпионат вылын петкӧдчис медбура. –Со тадзи и эштіс миян Рио вӧсна «тыш-кось». Оз нин мойви меным сулавны пьедестал вылын, оз нин кут юргыны Россиялӧн гимн, оз мӧдны нимкодясьны менам вермӧмӧн «висьысьяс»... Меным зэв забеднӧ татшӧм кывкӧртӧдысь. Некод миянӧс эз дорйы, чинаяслы быттьӧ веськодь ставыс. Синва весиг доршасьӧ, ӧд мыйта пӧсь ме кисьті, медым дасьтысьны тайӧ Олимпиада кежлас, кутшӧм ыджыд пай ме пукті лёгкӧй атлетика сӧвмӧдӧмӧ, кутшӧм бура петкӧдчи Чебоксарыын тавося чемпионатын. И ставыс весьшӧрӧ... – пасйис Олимпиадаса чемпионка Елена Исинбаева. Допинглы паныд водзсасьӧмыс медводз пузувтіс олӧмсӧ том спортсменъяслысь, кодъяс некор эз «дурны» вын содтан препаратӧн. На лыдын Сергей Шубенков, коді медводдзаысь на вӧлі мӧдӧдчӧ Олимпиада вылӧ, но сылӧн бур дум-кӧсйӧмыс оз нин збыльмы. Таысь ӧтдор зарни медальяс виччысисны и тяжелоатлетъяссянь, но неважӧн налӧн федерация пасйис, миянӧс пӧ тшӧтш вермасны не лэдзны Рио-де-Жанейроӧ, а на кындзи и пыжӧн сынысьясӧс. Велосипедистъяслы нинӧмысь повны. Велосипедӧн гӧньялысьяслӧн мирса федерацияӧн веськӧдлысь Брайан Куксон пасйӧма, Россияса спортсменъяс пӧ петкӧдчасны Олимпиада вылын. Повтӧг вермасны дасьтысьны Рио-2016 кежлӧ и художественнӧй гимнасткаяс да синхронисткаяс. Нинӧмысь повны и спортивнӧй гимнастика кузя сборнӧйлы, коді мунӧма нин Рио-де-Жанейроӧ. Олимпиада вылын Россиялысь нимсӧ кутасны дорйыны и волейболысь да гандболысь ворсысьяс. Теннис кузя федерацияса президент Шамиль Тарпищев висьталӧма нин, мый Риоӧ оз мун сӧмын Мария Шарапова. Вермасьӧм кузя сборнӧйысь Олимпиада вылӧ оз лэдзны сӧмын Виктор Лебедевӧс. Спортсменъяс пиысь коді нӧшта кутас видзӧдны Олимпиадасӧ гортас, лоас гӧгӧрвоана матысса лунъясӧ. Мирса ордйысьӧмӧдз абу нин уна кадыс... "Коми му" газет серти
Регион: 
Автор материала: