Миянысь ӧтдор – некод!

Август 2 лунӧ асывсяньыс ВДВ-лӧн флагъясӧн ӧвтчигтыр Сыктывкарса Коммунистическӧй уличаті зумыда восьлалісны югыдлӧз берет-тельняшкаа войтыр – десантникъяс. 10 часын «сынӧдса пехота» чукӧртчис Шогалысь салдатлы памятник дорын. Митингсӧ восьтӧм бӧрын десантникъясӧс чолӧмаліс юркарса администрацияӧн веськӧдлысь Андрей Самоделкин. –Талун ми пасъям медся тӧдчана военнӧй праздникъясысь ӧтиӧс. Нимкодь, мый ті, десантникъяс, и служитӧм бӧрад вылын кутанныд ассьыныд нимтӧ. И девизнытӧ – «Миянысь ӧтдор – некод!» – пыдди пуктанныд он сӧмын армияын служба дырйи, но и быдлунъя олӧмас. Сиа, медым югыдлӧз беретнытӧ ті пасьтавлінныд сӧмын праздник дырйи, а миян юр весьтын век мед вӧлі сӧстӧм лӧз енэж, – пасйис Андрей Николаевич. Сэсся десантникъясӧс чолӧмалісны республикаса Госсӧветысь депутатъяс, Афганистанса ветеранъяслӧн Россияса союзысь республикаса котырӧн веськӧдлысь Вадим Клюра да регионса десантникъяслӧн союзӧн юрнуӧдысь Сергей Копылов. Митинг вылӧ волысьяс казьтыштісны война-тышын пӧгибнитӧмаясӧс здук кежлӧ ланьтлӧмӧн, пуктісны Куслытӧм би да Шогалысь салдатлӧн памятник дорӧ дзоридзьяс. Кыдзи и быд во, Сыктывкарын митинг бӧрын десантникъяс мӧдӧдчисны гажӧдчыны Кӧрткерӧсса аэродром вылӧ. Сэні асланыс праздник вылын югыдлӧз берета да тельняшкаа войтыр кывзісны-видзӧдісны концерт, видлісны ассьыныс вынсӧ, сюсьлунсӧ да пельклунсӧ сідз шусяна боевӧй полоса вылын, чӧсмасисны полевӧй кухняын пуӧм рокӧн, юисны пӧсь тшай. Сӧмын парашютӧн чеччыштны десантникъяслы таво эз мойви, кӧрткерӧссаяс ассьыныс Ан-2 самолётъяссӧ абу удитӧмаӧсь дзоньтавнысӧ да. Кӧсйӧмаӧсь эськӧ сетлыны самолётъяссӧ Киров обласьтысь парма-ягын енэжсянь кусӧдчысьяс, кодъяс ӧні зільӧны Кӧрткерӧс районын, но абу артмӧма. Поводдяыс зэв жар, да вӧрын биысь видзчысьӧм могысь уджыс налӧн вывті уна. Сцена вывсянь чолӧмалана кывъясӧн найӧс вочаалісны Коми Республикаса юӧр сетан, информатизация да связь кузя министр Михаил Порядин, Кӧрткерӧс районса администрацияӧн веськӧдлысь Василий Гончаренко, регионса военнӧй комиссар Владимир Осипенко да ветеранъяслӧн ӧтмунӧмӧ пырысьяс. Та бӧрын десантникъяс пуксисны лэбувъяс улӧ, найӧс вӧлі вӧчӧмаӧсь парашют куполысь. Нуръясьыштӧм да боевӧй сё грамм юӧм бӧрын быдӧн вермис видлыны ассьыс вынсӧ армрестлингын, боксын, лэптавны кер, петкӧдлыны винёвлунсӧ «Зумыд ош» вермасьӧмын да шыблавны гира. Таысь ӧтдор унаӧн лыйсисны пневматика винтовкаысь, шыблалісны пурт, а зонпосни ворсісны шахмат-шашкиысь. Гаж вылӧ воысьяслы медся ёна кажитчис «ВДВ-са ветеранлӧн комплекс». Сійӧс сдайтысьлы колӧ вӧлі гоз-мӧдысь кыпӧдчывны турник вылын, котӧртны полоса, веськавны пистолетысь мишеньӧ да разьны-чукӧртны автомат. Медтэ-рыбъясӧс пасйисны грамотаясӧн да козинъясӧн. Кыдзи и быд во, ВДВ-лӧн гаж вылӧ таво унаӧн волісны семьянас. Та вӧсна зонпоснилы вӧлі котыртӧма торъя йӧр, кӧні челядьӧс гажӧдісны мультфильмъясысь геройяс. Томулов пӧттӧдзыс чеччаліс-уяліс кос турунті, пырӧдчис конкурсъясӧ да видзӧдіс том артистъяслысь сцена вывсянь петкӧдчӧмсӧ. Поводдяыс вӧлі мича, и унаӧн пукалісны-гожъялісны видз вылын, кывзісны сьыланкывъяс, чӧсмасисны коми пӧжасӧн да кӧдзыд ырӧшӧн. * * * «Сынӧдса пехоталӧн» луныс нюжаліс сёр рытӧдз. Кыдзи пасйисны асьныс десантникъяс, Кӧрткерӧсын гажыс налы воӧма сьӧлӧм вылас. Торйӧн кӧ, зэв пӧ вӧлі нимкодь аддзыны гажӧдчысьяс пӧвстысь томуловӧс да зонпосниӧс. Эскам пӧ, регыд и налӧн киын кутас кыпыда дӧлавны ВДВ-лӧн флаг. "Коми му". Павел КОРОЛЁВ. Снимокыс авторлӧн.
Регион: 
Автор материала: