Слӧбӧдаын кыпыд гаж

Кольӧм субӧтаӧ кыпыд вӧлі Сыктывкарса Эжва районын. Сэні олысьяс да гӧсьтъяс пасйисны Слӧбӧда сиктлы 430 да сысянь пансьӧм Эжвалы 53 во тырӧм. Гажыс заводитчис асывнас 10 часын. Колӧ шуны, поводдянас эз ёна мойви. Асывсяньыс зэрис-кӧтӧдіс. Но та вылӧ видзӧдтӧг гажӧдчыны воалісны быдса семьяясӧн. Медвойдӧр чукӧртчӧмаяс кыпыда восьлалісны быд ногӧн мичмӧдӧм яръюгыд рӧма зонтикъяс улын. Тайӧ аслыспӧлӧс шествиеас пырӧдчис 80 гӧгӧр морт. Тані вӧліны шондіюр, и дзоридз, да весиг ботан сяма зонтикъяс. Ӧтияс вӧлі вурӧмаӧсь зонт вылас ичӧтик небыдик чача, мӧдъяс вышивайтӧмаӧсь, а кодкӧ ляскӧма ылӧга сьӧм. Вӧліны весиг черань везъя да повзьӧдчана серпаса зонтъяс. Ирина, кыдз ачыс висьтасис, серпасалӧма Эжваса уличьяс да ги- жӧма, мый зэв ёна радейтӧ ассьыс районсӧ.

—Ме — серпасасьысь. Менам зонтыд зэв уна. Тайӧс мавті акрил краскаӧн. Сыӧн вӧдитча мӧд во нин. Колӧ шуны, зэв на и бура кутӧ ватӧ. Удж вылын зонтикъяссӧ серпасалам челядькӧд, нуӧдам мастер-классъяс. Эжвалы сиӧм гажыс муніс некымынлаын. Слава уличавывса паркын быдмысь войтыр вермасисны, вын-эбӧссӧ песісны, а сідзжӧ ворсісны, сьылісны-йӧктісны. Вӧлі и «Сладкий ГолосОК» конкурс. Донъялісны и нывбаба-мамъяслысь сямсӧ, кодлӧн варенньӧыс медся чӧскыд. И Слӧбӧдаса изэрд вылын лунтыр концертасисны. Районса творческӧй котыръяс петкӧдлісны сэні сьылан-йӧктан сямсӧ. А орчча ларёкъясын вузасисны киподтуя войтырӧн дасьтӧм сувениръясӧн, пуысь вӧчӧмторъясӧн... Эжваын олысьясӧс чолӧмаліс Сыктывкарса сӧветӧн веськӧдлысь Валерий Козлов. Сылӧн кывъяс серти, Эжва — зэв сӧстӧм да пельк район, кӧні олӧны уджач йӧз, кодъяс прӧст кадӧ окотапырысь пырӧдчӧны спортӧ, радейтӧны гажӧдчыны.

—Весиг зэрыс эз вермы торкны миянлысь гажнымӧс. Тайӧ луныс зэв тӧдчана. Талун миян Эжвалӧн — 53-ӧд чужан лун. Ме эска, мый кӧленаысь кӧленаӧ кутам вуджӧдны сы дорӧ пӧсь муслунсӧ, — висьталіс районса администрацияӧн юрнуӧдысь Александр Калинин. Зэр лӧньыштӧм бӧрын пансис «Семья вместе — и душа на месте» конкурс. Районса медбур семьяяс венласисны, коді медся аслыспӧлӧс, спортӧ пырӧдчысь да медся ёна радейтӧ гажӧдчыны... Эжвасаяс висьтасисны, мый бурсӧ вӧчӧмаӧсь районын физкультура да спорт сӧвмӧдӧм могысь кольӧм во. Сідз, тані сувтӧдӧмаӧсь тренажёръяса выль комплекс, выльмӧдӧмаӧсь-дзоньталӧмаӧсь баскетболысь ворсан площадка. Таво восьтӧмаӧсь вын песан нӧшта ӧти спорткомплекс... Районса олысьяс гожӧмбыд весалӧмаӧсь-пелькӧдӧмаӧсь уличаяс. Ас костаныс нуӧдӧмаӧсь «Медбур керка йӧр», «Медбур клумба» да «Медбур балкон» конкурсъяс... Тайӧ жӧ лунӧ котыртлісны выль, тавося нин картупельлы сиӧм гаж. Петкӧдлісны неыджыд сценка, кӧні роч императрица Екатерина Великая тшӧктӧ разӧдны-вӧдитны картупельсӧ Россия пасьтала. А сэсся быттьӧ веськалӧ ӧнія кадӧ да ёна и нимкодясьӧ, мый «мӧд няньыд» эм быд керкаын... Торъя жюри чӧсмасис да донъяліс выль картупельысь дасьтӧм сёян. Вӧліны и салатъяс, и пӧсь пӧжас. Медбуръясӧн шуисны «Бумажник» вузасян котырӧс, «Феникс» ООО-ӧс, «Общепитӧс». Вермысьяслы сеталісны дипломъяс, висьталісны аттьӧалана кывъяс... Тайӧ жӧ лунӧ нимӧдісны Сыктывкарса вӧр техникум, кодлы таво тырӧ 50 во, Эжваса «Коми культура шӧринӧс», коді восьтіс ӧдзӧссӧ 20 во сайын, а сідзжӧ «Моя Эжва» газетын зільысьясӧс. Налӧн медводдза номерыс петӧма 10 во сайын. Рытнас «Бумажник» стадионын юргис-шыаліс концерт. Эжвасаясӧс да районса гӧсьтъясӧс республикаса Юралысьлысь удж вӧчысь Сергей Гапликов нимсянь чолӧмаліс Сыктывкарса администрацияӧн веськӧдлысь Андрей Самоделкин. А сэсся чукӧртчӧмаясӧс гажӧдіс роч сьылысь Наталья Гулькина. Помасис концертыс кыпыд салютӧн.

Павел Королев.

"Коми му" газет.

Снимокъясыс ӧтуввезйысь.

Регион: 
Автор материала: