Москваын зiльысь дипломатъясöс тöдмöдiсны Коми Республикаöн. Презентация мунiс октябрь 15-öд лунö Россияса Президентбердса Коми Республикалöн Представительствоын. Кыдзи юöртiсны республикаса веськöдлан котырлöн пресс-службаын, мероприятиеас пырöдчис 60 гöгöр дипломат. Коми Республикаса Юралысь Владимир Торлопов висьталiс гöсьтъяслы республиканымлöн мукöд государствокöд йитöдъясын да öтув уджын позянлунъяс йылысь. Талун республика зiля уджалö Баренц Евро-Арктическöй регионлöн Сöветын, Войвыв форумын да Арктическöй Сöветын, пыртö экономикаö выль технологияяс да корсьö содтöд сьöм сiйöс сöвмöдöмö, лöсьöдö öтув транспортнöй инфраструктура да зiльö видзны вöр-ва да экология. Юралысь пасйис, мый талун республикаын нуöдöны общественно-политическöй, экономическöй форумъяс, став Россияса да войтыркостса культурнöй мероприятиеяс. Сыктывкарын кöсйöны котыртны войтыркостса журналистъяслысь конференция да велöдны республикаын профессиональнöй дипломатъясöс. Презентация бöрын республикаса артистъяс петкöдлiсны концерт.
Коми народное радио
