А сэсся Санкт-Петербургӧ зарни медальла

Сьӧкыд штанга лэптавны волісны Сыктывкарысь, Ухтаысь, Усинскысь, Воркутаысь, Мылдінысь, Сыктыв, Изьва, Кулӧмдін да Кӧрткерӧс районъясысь 64 спортсмен. Кыдзи пасйис ордйысьӧмлӧн судья Андрей Бабиков, зэв пӧ нимкодь аддзыны, мый республикаын та мындаӧн водзмӧстчӧны пауэрлифтингын. –Унджыкыс вермасны регыдъя кадӧн босьтны спорт мастерлысь ним. На пиысь медбуръясыс кутасны дорйыны Коми Республикалысь нимсӧ Санкт-Петербургын, – висьталіс сійӧ. Мужичӧйяс пӧвстын медвына спортсменъясӧн лоисны Ухтаса войтыр. Сӧмын Сыктывкарысь Роман Васильев вермис мырддьыны зарни медальсӧ ас сьӧктаяс пиас. Аньяс пӧвстын медводдза местаяссӧ босьтісны Сыктывкарса спортсменкаяс: Лина Прайс, Анна Рекочинская да Владислава Бушуева. Кыдзи пасйис тренер Александр Морозов, Комиысь спортсменъяслӧн пӧ сямыс да выныс тырмас, медым вермасьны Россияса ордйысьӧмъясын. –Чайта да, талун ми быдтам аскиа спортса кодзувъясӧс, кодъяс оз янӧдны республикалысь бур нимсӧ. И Санкт-Петербургын Россияса Рытыв-Войвыв федеральнӧй кытшын ордйысигӧн найӧ став вын-эбӧссӧ сетасны, медым шедӧдны зарни медаль, – висьталіс Александр Григорьевич.

Юӧрнас юксис "Коми му" газет

Регион: