Ас вӧлӧга вузалӧм

Февральын на сідз шусяна «часі улысь» вузасьӧм вуджӧдлісны важ рынок инӧ. Бассейндорса эрд пӧ оз лӧсяв санитарнӧй да пӧжарнӧй нормаяслы. Кык тӧлысь мысти нин ас вӧлӧга вузалысьяс гижисны письмӧ Сергей Гапликовлы, мый налӧн кык пӧв чиніс нажӧтка. Йӧзыс пӧ важ рынокас оз волыны да ёнасӧ оз и тӧдны, кӧні сійӧ. Корисны веськӧдлысьлысь вуджӧдны найӧс мӧдлаӧ. И со Андрей Самоделкин карса мэр юӧртiс, мый фермеръяс колясны важ инас. Но рыноксӧ лӧсьӧдасны, тэчаласны вузасян радъяс да палаткаяс, вайӧдасны электричество. Градоначальник пасйӧ, мый ас вылӧ уджалысьяслӧн усис нажӧтка нӧшта и сы вӧсна, мый йӧзыс этшаджык кутіс босьтасьны. Тайӧс пӧ петкӧдліс «Урожай 2016» неважӧнся медшӧр ярманга. Таво сійӧ нажӧвитіс бӧръя вояс серти медся ичӧт сьӧм.

Юӧртӧ "Юрган" радио

Регион: